译吧网

您好,欢迎来译吧网!客服QQ:89411289 客服电话:15311317772 帮助中心

7×24小时翻译服务热线:15311317772(孟)

您的位置: 主页 > 民族语文 > 壮族文化 > Roengz Bit Baenz Va Faenzcieng Ndeiraeuh

Roengz Bit Baenz Va Faenzcieng Ndeiraeuh

来源: 未知

——Geiq Gaiq Daeuz Daengx Gih Siujhagseng Yienhciengz Sawcuengh Faenzcieng Doxdax

□ bonjbauq gicej Cau Dwzfeih/赵德飞

Swcigih Gyauyuz Dingh Minzgyaucu cucangj Veiz Lanz- mingz caeuq siujhagseng ndaej it daengj ciengj haenx hab’ingj.

Veiz Lanzmingz cucangj fat ciengj hawj siujhagseng ndaej it daengj ciengj haenx.

Gvangjsih Minzcuz Dayoz Vwnzyozyen fu- gyausou Luz Yungjbinh daiqbiuj bingzveijvei guh diemjbingz.

Sawcuengh faenzcieng doxdax yienhciengz.

Bingzveij nyinhcaen gaij gienj.

Doxdax sat le lauxsae cam faenzcieng sij ndaej baenzlawz yiengh.

Doxdax sat le siujhagseng ciepsouh gicej caijfangj.

  10 nyied 22 hauh, Gaiq Daeuz Daengx Gih Siujhagseng Sawcuengh Faenzcieng Doxdax youz Swcigih Gyauyuz Dingh cawjbanh、 Guengjsae Minzcuz Gyauyuz Fazcanj Cungsim bangbanh haenx youq Namzningz Si Sihyenz Fanden funghranz haihoih banh. 69 boux siujhagseng daj daengx gih 21 aen yienh(si、gih) daeuj haenx camgya baez yienhciengz Sawcuengh faenzcieng doxdax neix.

  Baez doxdax neix faen A、B song cuj, A cuj dwg 3~4 nienzgaep hagseng camgya, B cuj dwg 5~6 nienzgaep camgya, doxdax bauqmingz yungh gij fuengfap hagseng gagnyienh bauqmingz; Cuengh Gun song saw vah hagdangz yiengq yienh(si、gih) gyauyuzgiz doigawj hagseng maenhndei; yienh(si、gih) gyauyuzgiz senjdingh bouxcamgya bae camgya daengx gih doxdax. Caemhcaiq iucingj Swcigih Minzyijveij、 Cungguek Minzcuz Yijvwnz Fanhyizgiz、 Guengjsae Minzcuz Daihhag、Guengjsae Sawcuengh Hagdangz daengj danhvei 10 boux lauxhangz guh bingzveij baez yienhciengz Sawcuengh faenzcieng doxdax neix.

  Doxdax yienhciengz, gyoengq siujhagseng bouxboux simdingh gagsaenq, yungh Sawcuengh raeuzrwdrwd sij ok baenz aen baenz aen gojgaeq ndeigyaez. Gyoengq siujhagseng caenhcingz sij, sij ok gij gejdoeg doiq doxgaiq moq、 gij siengjmuengh daengzcog, aeu gij siengjmuengh gyaeundei vaq baenz saehyinx lwgnyez, ndawde yienh’ok le gij angqyangz seiz iq lwgnyez lai raeuh. Yaepyet mbaw ceij hoengq sij faenzcieng haenx couh sij rim lo.

  Doxdax sat le, Sanglinz Yen Dafungh Cin Vangzcouh Siujyoz seiq nienzgaep hagseng Lij Danh doiq gicej naeuz: “Baez doxdax neix faenzcieng daezmoeg haemq ngaih, gou sij le 400 lai cih, mauhgvaq gij soqmoeg doxdax iugouz haenx, gou roxnyinh gig ngaih, danghnaeuz baez laeng lij banh, gou lij siengj camgya baez dem.”

  Ginggvaq bingzveij yienhciengz gaij gienj hawj faensoq, baez doxdax neix A cuj bingzsenj ok 4 boux it daengj ciengj, 8 boux ngeih daengj ciengj, 10 boux sam daengj ciengj; B cuj bingzsenj ok 6 boux it daengj ciengj, 12 boux ngeih daengj ciengj, 19 boux sam daengj ciengj.

  Swcigih Gyauyuz Dingh Minzcuz Gyauyuzcu cucangj Veiz Lanzmingz youq fat ciengj denjlij naeuz, Vahcuengh dwg gij hongdawz siengjnaemj caeuq doxgyau youqgaenj beksingq Bouxcuengh, hix dwg gij hongdawz caeuq caidij youqgaenj swnjcienz、cienzboq vwnzva Bouxcuengh. Haiguh baez Sawcuengh faenzcieng doxdax neix muzdiz dwg daezsang naengzlig hagseng yungh Vahcuengh Sawcuengh, gungganq gij yinxdaeuz hagseng hagsib Sawcuengh, daezhawj aen daizheiq he hawj hagseng Bouxcuengh langhbaij bonjfaenh, fungfouq gij saedceij ndawhag Cuengh Gun song saw vah hagdangz, ndaejdaengz gij Cuengh Gun song saw vah sonhag gyauyenz vunqsik moq aeu “sai” coi “yenz ”, aeu “yenz” coi “gyau”, “sai、yenz、gyau” dox giethab haenx, caux ok gij heiqfaenh ndei Cuengh Gun song saw vah sonhag gyauyenz, coicaenh gih raeuz hong Cuengh Gun song saw vah gyauyuz hwngfat.

  Youq gwnz fat ciengj denjlij, Guengjsae Minzcuz Daihhag Vwnzyozyen fu’gyausou Luz Yungjbinh daiqbiuj bingzveijvei guh diemjbingz. Gyoengq bingzveij nyinhnaeuz baez Sawcuengh faenzcieng doxdax neix, miz ndei, hix miz rwix. Gij ndei dwg: Faenzcieng daezcaiz gvangq, gyoengq siujhagseng ndaej daj henz ndang bonjfaenh roengzfwngz, sij gij vunz henz ndang vunzcaen、 lauxsae、 doengzhag daengj; faenzcieng neiyungz miz gag guhcawj yiyi, ndaej sij ok gij cingz ndaw sim, haenh caen、 sienh、gyaeu ndaw saedceij; gij neiyungz faenzcieng cungsaed, gezgou caezcingj, dingzlai siujhagseng ndaej sij ok gij saehgienh fatseng seizgan、 deihdiemj、 vunz、 ginggvaq daengj, caemhcaiq sij ok caencingz dem; dingzlai siujhagseng Sawcuengh sij ndaej doengswnh dangqmaz, sij ndaej gveihfan, sawloih fungfouq, caemhcaiq rox yungh gij fuengfap siuhswz dem, hawj faenzcieng engqgya sengdoengh hingzsieng. Hoeng lij miz dieg mbouj gaeuq ndei, miz mbangj siujhagseng gyoepsij Sawcuengh nem sing、 yinh、 diuh lij caengz sug, Sawcuengh sij ndaej loekloeng haemq lai; neiyungz faenzcieng bien daez、 liz daez; neiyungz faenzcieng cungzfuk、 fanfoek sij daengj. Gyoengq bingzveij genyi: Gak aen Cuengh Gun song saw vah hagdangz aeu gyagiengz doeg sij lienhguh sing、 yinh、 diuh Sawcuengh, hawj hagseng rox yungh Sawcuengh; Cuengh Gun song saw vah lauxsae aeu sonyinx hagseng sij faenzcieng, daj ngaih daengz hoj, daj cih、 swz、 gawq, daengz faenzcieng gyagiengz sonyinx hagseng.

 

 

Tags: