译吧网

您好,欢迎来译吧网!客服QQ:89411289 客服电话:15311317772 帮助中心

7×24小时翻译服务热线:15311317772(孟)

您的位置: 主页 > 民族语文 > 壮族文化 > Namzningz Si “Riengz Gou Hag Sawcuengh” Banbeizyin Geiz D

Namzningz Si “Riengz Gou Hag Sawcuengh” Banbeizyin Geiz D

来源: 未知

□ bonjbauq gicej Moz Beibei/莫蓓蓓

  Vih swnjcienz caeuq fatyiengz minzcuz vwnzva, henhoh gij gienzleih saujsu minzcuz hagsib、sawjyungh caeuq hwngfat saw vah minzcuz bonjfaenh, laebhwnj gij saedceij vahgangj lai cungj lai yiengh, 10 nyied 22 hauh banhaet, Namzningz Si Minzcunghveij、Namzningz Si Minzyijveij caeuq Namzningz Sinhvwnzvangj、Cinghsiu Gih Minzcunghgiz (Minzyijgiz) itheij banh geiz daihngeih “riengz gou hag Sawcuengh” beizyinbanh youq Namzningz swnhleih haiban.

  Lauxsae maenh’ak daeuj sonyinx yozyenz cozgeq cungj gangj ndei.

  Aen beizyinbanh neix hai ngoenz ndeu, cienzbouh mbouj aeu cienz, faen baenz banhaet caeuq banringzgvaq song dangz goq, miz 60 lai boux yozyenz daj Namzningz gak yienhgih daeuj camgya. Dangzgoq banhaet dwg Cungguek Minzcuz Yijvwnz Fanhyizgiz hoizsaemj Gvanh Swgingh caeuq Guengjsae Sam Nyied Sam Cazcise cungjbien、hoizsaemj Cinz Siengzcouh hwnjdangz. Gij conhgyah gangjvah feihdauh ndeimaez, gyoengq yozyenz dingq ndaej gig nyinhcaen.

  Laj gorungz sing fwen yiengj yinx ndaej gyoengqvunz daeuj ngonzyawj.

  Banringzgvaq youq Guengjsae Vwnzvuzyen son eu fwen, Swcigih Minzyijveij gvendaengz lingjdauj daeuj yienzdieg cijdauj. De gujli bouxcoz aeu coh bangeq hagsib, ciepswnj caeuq hwngfat gij conzdungj Bouxcuengh maij eu fwen, hai bak eu fwen. Bouxvunz Namzningz Si Minzcunghveij、Guengjsae Minzgenh Vwnzyi’gyah Hezvei Yisuzdonz hix camgya hozdung. Sing dig caeuq sing fwen youq laj gorungz mbinyag, ciuyinx gyoengqvunz daeuj ngonz.

  Beizyinbanh gaxgonq guh ndaej ndei geiz neix vunz rim hix aeu daeuj.

  Dingqnaeuz geiz daih’it banbeizyin 8 nyied 23 hauh youq Vujmingz haiban, gyoengq yozyenz ndiepgyaez dangqmaz. Aenvih geiz daih’it guh ndaej ndei, geiz daihngeih yaek haiban couh ndaej daengz gyoengqvunz gak fueng dawz haeuj sim, yienzlaiz giva aeu 50 boux doeklaeng cix miz 60 lai boux vunz bauqmingz.

  Namzningz Si Minzcunghveij bouxfucwz naeuz, yienznaeuz Namnzningz Si youq gij gunghcoz doihengz sawjyungh Sawcuengh miz itdingh cingzcik, hoeng lij miz haujlai gunghcoz yaek bae guh. Laebguh ban beizyin “riengz gou hag Sawcuengh”, mboujdan ndaej hawj caezgya engq rox Sawcuengh, gamjdaengz gij gyaeundei Bouxcuengh vwnzva, caemhcaiq doiq doihengz sawjyungh Sawcuengh、hwnghoengh caeuq hwngfat gij vwnzva minzcuz、doidoengh minzcuz doxgiet hix miz cizgiz cozyung.

 

 

Tags: